على مركب الاحزان

على مركب الاحزان
راكب بقالي زمان
وباحلم الاقي الفرح
مركب شراعه امان
مجدافه قلب حنون
عهد الوفا بيصون
وف عز موج الغدر
صامد صحيح انسان
على مركب الاحزان
باحلم ونفسي الحلم
يصبح حقيقه وعلم
ملّيت انا م الجرح
ملّيت سنين الظلم
لفيت مواني كتير
ملقتش اي ضمير
كأن الحب واللا
وراح مع النسيان
على مركب الاحزان
رافض انا لليأس
رافض ظلام الامس
ومهما طال الليل
بكره ح تطلع شمس
الحب تاني يعود
والفرح يعلى يسود
ييجي الربيع بورود
يطرح عبيرها حنان
على مركب الاحزان