ابعديني عن حياتك

اهجريني وابعديني عن حياتك
حبي صعب تلاقي فيه نفسك وذاتك
حبي صعب يكون دليلك ف الحياه
قطر عمرك ح تلاقيه مع حبي فاتك
اهجريني وابعديني عن حياتك
قلبي عشش جوه منه ضلام ويأس
قلبي حاسس ان بكره زي امس
والحياه معدتش تفرق ضلمه شمس
صدقيني اطوي صفحة ذكرياتك
اهجريني وابعديني عن حياتك
مدي ايدك سلمي اخر سلام
واهجري دنيا المواجع والالام
اهجريها من سكات من غير كلام
اهربي من دنيا اخرتها اهاتك
اهجريني وابعديني عن حياتك