حبال دايبه

متعلقين ف حبال دايبه
وجارفنا وياه التيار
لكن قلوبنا ولا تايبه
بتغني على نغم الاوتار
غنوة مسيرك يا الم
مهما اتماديت
تدبل وحبات الامل
تلقى لها بيت
والشمس ترجع تنطلق جوه المدار
بأيدينا ايه معملنهوش
م تردوا يا اصحاب الكلام
رضينا باللي م نرضهوش
وياريته كان ف حياتنا دام
حبة سلام كل اللي طلبينه بصحيح
حبة سلام
غيه يلملم ضلها
كل اللي باقي م الحمام
والدنيا لو كانت مزاد
من حقنا نعرف بكام
غصن الحنان غصن الامان
او غصن حلم برئ وخام
عايش محاوطاه الالام
لكن بيتهجى النهار
متعلقين ف حبال دايبه
وجارفنا وياه التيار